Серқуёш ҳур ўлкам, элга бахт, нажот, Сен ўзинг дўстларга йўлдош, меҳрибон.
Яшнагай то абад илму фан, ижод,
Шуҳратинг порласин токи бор жаҳон!..
Мана, 27 йилдирки, мустақил Ўзбекистонимиз халқи шу сўзлар билан бошланувчи мадҳиямиз садоси остида янги кунни яхши ниятлар билан қарши олади. Давлат мадҳияси янграганда кўнглимиз ғурур ва ифтихор туйғусига тўлади. 1992 йил 10 декабрда қабул қилинган "Ўзбекистон Республикаси Давлат Мадҳияси тўғрисида"ги Қонуннинг 2-моддасида: "Ўзбекистон Республикасининг Мадҳиясига зўр эҳтиром билан қараш Ўзбекистон Республикаси ҳар бир фуқаросининг ватанпарварлик бурчидир", дея қайд этилган. Ўзбекистон Қаҳрамони, Ўзбекистон халқ шоири Абдулла Орипов сўзи ва атоқли композитор Мутал Бурхонов мусиқаси асосида яратилган мадҳиямиз мустақил Ўзбекистонимизнинг ёрқин тимсоли сифатида янграмоқда. Президентимизнинг турли давлатларга расмий ташриф билан борганида, юртимизга келган мартабали меҳмонларни кутиб олиш чоғида, халқаро миқёсдаги тадбирлар ва спорт мусобақаларида мадҳиямиз янграб, кўз ўнгимизда юртимиздаги беқиёс бунёдкорликлар, илму-маърифатнинг гуллаб яшнаётгани, серқуёш ҳур ўлкамиз намоён бўлади. Мадҳиямиз ижро этилганда қўлимизни кўксимизга қўйиб унга жўр бўламиз, дилимиз фахр ва ғурурга тўлади. Бағри кенг ўзбекнинг ўчмас иймони, эркин ёш авлодлари, улуғ халқ қудрати, тинчлик посбони, ҳақсевар она юртимиз ҳур Ўзбекистонни мадҳ этган мадҳиямиз халқимизга руҳий мадад бўлиб асрлар давомида баралла янграйверсин.
Эшпўлат Сафаров,
журналист.
журналист.
