Мунаввар тонг қучоғида шукроналик дуоларини пичирлаб жаннатий ҳовлисида гуллар билан тиллашаётган, кафтдек ерни ҳам бўш қолдирмасдан, ҳатто мевали дарахт тагида ҳам бодринг ўстириб дили яйраётган бу жуфтликка Янгиобод маҳалласида ҳавасмандлар кўп.Холмурод ака хонадонига киришингиз билан ўндан ортиқ ноёб гул навлари меҳр билан парваришланаётганига гувоҳ бўласиз. Бир муддат бундай гўзалликка маҳлиё бўлиб, хонадон эгасига таҳсин айтишингиз шубҳасиз.
Томорқа илмида беназир бу деҳқон ер билан тиллашиб, оддий ўзбекона кетмони ёрдамида ўн саккиз сотих томорқасида озиқ-овқат маҳсулотлари-ю полиз экинлари ҳамда мевали дарахтларидан олаётган ҳосилининг ўз эҳтиёжидан ортиғини деҳқон бозорида сотиб, яхшигина даромад ҳам олади. Холмурод аканинг гапига қараганда ҳали қиш фасли ҳукумрон бўлган февраль ойида оддий халта-тўрвалар ичига экилган картошка уруғнинг ҳар биридан тўрт-беш килограммдан ҳосил олибди. Икки бош сигирдан олинадиган сут-қатиқ маҳсулотлари ҳам сероб. Қишлоқ шароитида томорқасида деҳқончилик илмига риоя қилиб самарали меҳнат қилган инсонларнинг оилавий даромади ҳам ҳамиша эл ҳавас қилгулик бўлади.
Бу файзли хонадонда фақат ўғил болалар камол топган бўлсада, хонадоннинг маҳалладаги "энг гулзор ҳовли" деб эътироф этилишида гулчилик соҳасида гўзалликка ошно келин деб ном олган Назира опанинг олдига тушадиган йўқ. Шунинг учун ҳам Холмурод ака Ўроқовлар хонадонига кираверишингизданоқ бу ерда суврати-ю сийрати гўзал инсонлар истиқомат қилишига ҳавасингиз келади.
Кўнгли, уйи гулзор яхшиларга Тангримнинг раҳматлари ёғилсин.
Азиза БОЙМУРОДОВА.
