Har qanday davlatning kelajagi, avvalo, bugungi yosh avlodning bilim va tarbiyasiga, ijtimoiy faolligi hamda hayotga bo‘lgan munosabatiga bog‘liq. Zamon qanday bo‘lmasin, uni oldinga eltuvchi asosiy kuch – bu bilimli, salohiyatli, vatanparvar, tashabbuskor va fidoyi yoshlardir. Shu ma’noda, yoshlar nafaqat bugunning umidi, balki ertaning hal qiluvchi kuchi sanaladi.
Mustaqil O‘zbekistonda yoshlarga oid masalalar har doim davlat siyosatining ustuvor yo‘nalishlaridan biri bo‘lib kelmoqda. Ayniqsa, so‘nggi yillarda bu boradagi islohotlar yangi bosqichga ko‘tarildi. Prezidentimiz tomonidan ilgari surilgan “Yoshlar – kelajagimiz” tamoyili amalda chuqur mazmun kasb etib, yoshlar uchun keng imkoniyatlar eshigini ochdi. Bugungi kunda yurtimizning barcha hududlarida yoshlar markazlari, zamonaviy kutubxonalar, sport inshootlari, IT va innovatsion ta’lim maskanlari faoliyat yuritmoqda. Bu esa yoshlarning ijtimoiy faolligini oshirib, ularning hayotga bo‘lgan munosabatini tubdan o‘zgartirmoqda.
Zamonaviy yoshlar xorijiy tillarni puxta o‘zlashtirib, IT texnologiyalar, ilm-fan va innovatsiyalar bilan faol shug‘ullanmoqda. Bu, o‘z navbatida, nafaqat shaxsiy muvaffaqiyat, balki mamlakat taraqqiyotiga qo‘shilayotgan bebaho hissadir. Endi yoshlar orzu bilan yashamaydi, balki orzusini reja qiladi va unga erishish yo‘lida intiluvchanlik bilan harakat qiladi. Ular o‘z ustida tinmay ishlaydi, dunyoqarashini kengaytiradi, zamonga hamnafas bo‘lib yashashga intiladi. Bu esa yurtimizning ertangi porloq istiqboli uchun mustahkam poydevor yaratadi.
Shu bilan birga, yosh avlodning ma’naviy immunitetini mustahkamlash masalasi ham dolzarb bo‘lib qolmoqda. Axborotlar oqimi keskin kuchaygan davrda turli mafkura va g‘oyaviy tahdidlar oldida yoshlar to‘g‘ri yo‘lni tanlashi uchun ularga puxta tarbiya berish zarur. Bu borada iymon-e’tiqod, milliy g‘urur, tarixiy xotira va qadriyatlar asosiy tayanch bo‘lishi lozim. Vatanparvarlik, halollik, mehnatsevarlik, kattalarga hurmat kabi fazilatlar har bir yosh yuragida mustahkam o‘rnashmog‘i kerak.
Shu jihatdan qaraganda, yoshlar jamiyatdagi o‘z o‘rnini chuqur anglab yetmog‘i zarur. Ular shunchaki bilim oluvchi emas, balki islohotlar ijrochisi, jamiyatdagi o‘zgarishlarga faol hissa qo‘shuvchi kuchdir. Bugungi kunda har bir yigit-qiz o‘z salohiyatini ro‘yobga chiqarish imkoniga egadir. Bu imkoniyatlardan samarali foydalanish esa har bir yoshning burchi bo‘lishi kerak.
Xulosa qilib aytganda, yosh avlodga e’tibor – bu kelajakka e’tibordir. Har bir yosh o‘z yo‘lini topib, jamiyatda munosib o‘rin egallasa, yurt taraqqiyoti uchun xizmat qilsa – bu yurtimizning eng katta yutug‘i bo‘ladi. Ana shundagina “Yoshlar – kelajagimiz” degan so‘zlar hayotiy haqiqatga aylanadi.
Muxlisa ALIXONOVA,
Termiz davlat universiteti talabasi.
