Markazda imkoniyati cheklangan bolalarning ta’lim olishi uchun zarur sharoitlar yaratiladiKattaqo‘rg‘on tumani hokimi Jamshid Nasriddinov Samarqand viloyati Maktabgacha va maktab ta’limi boshqarmasi boshlig‘i Muzaffar Hamdamov bilan birgalikda 32-umumta’lim maktabida bo‘lib, tumanda tashkil etilishi rejalashtirilgan “Ilk rivojlantirish markazi” uchun mo‘ljallangan qo‘shimcha binodagi sharoitlar bilan tanishdi.
Shuningdek, ular tumandagi 5-umumta’lim maktabida bo‘lishib, CEREBRY platformasidan samarali foydalanib, bilimlarini mustahkamlab kelayotgan 9-sinf o‘quvchilari bilan suhbatlashdilar. Shuningdek, 5-sinf o‘quvchilarining badiiy kitoblarning ahamiyati haqidagi fikrlarini tingladilar.
Shundan so‘ng, Samarqand viloyati Maktabgacha va maktab ta’limi boshqarmasi boshlig‘i Muzaffar Hamdamov Kattaqo‘rg‘on tumani maktabgacha va maktab ta’limi bo‘limida bo‘lib, xodimlar bilan muloqot qildi.
Muloqot davomida O‘zbekiston Respublikasi Prezidentining 2025-yil 19-martdagi “Maktabgacha va maktab ta’limi sohasida boshqaruv tizimi samaradorligini oshirishning qo‘shimcha chora-tadbirlari to‘g‘risida”gi 51-sonli Farmonining mazmun-mohiyati haqida so‘z yuritib, bu hujjat soha xodimlarini rag‘batlantirish borasidagi islohotlarning mantiqiy davomi ekanligini ta’kidladi. Xodimlar uchun yaratilgan sharoitlar va bo‘limning moddiy-texnik bazasi bilan ham tanishdi.
O‘tkir Usmonov.
