13-mart kuni tumandagi "Kumush tola" xususiy korxonasida "Ipak qurti parvarishlash va tutchilik sohasiga oid zamonaviy texnologiyalarni qo’llash" mavzusida o’quv seminari o’tkazildi.
O’quv seminarida Viloyat hokimi o’rinbosari, Oila va xotin-qizlar boshqarmasi boshlig’i Zebo Saidova, Ipakchilik ilmiy-tadqiqot instituti bo’lim mudiri Davron Sodiqov, tuman hokimi o‘rinbosari Sayyora Jumayeva, "Kumush tola" korxonasi rahbari Maryam Niyazova hamda faol pillachi xotin-qizlar ishtirok etdi.
Pillani qayta ishlash va ipak mahsulotlari ishlab chiqarishga ixtisoslashgan "Kumush tola" xususiy korxonasining asoschisi Maryam Niyazova. Uning korxonasi nafaqat ipak mahsulotlari ishlab chiqarish bilan cheklanib qolmay, balki qishloq xo‘jaligi pillalarini qayta ishlash orqali qishloq aholisi uchun qo‘shimcha daromad manbasi yaratdi. Bu esa mahalliy iqtisodiyotni rivojlantirishda muhim ahamiyat kasb etmoqda.
Ipak qurti - tabiatning mo’jizasi. Bunday deyishimizning boisi, u juda qisqa vaqt ichida muhim sanoat xom ashyosi - oppoq pilla o’raydi. Uning har biridan o’rtacha 800-950 metr tola olish mumkin. Yurtimizda to’qilgan adras, atlas, shoyi kabi matolarning dovrug’i dunyoga taralgan.
2025-yilda pillachilik sohasida qisqa muddatda 810 nafar pillachilarni o’qitish rejalashtirilgan.
Seminar davomida pillani samarali yetishtirish, dezinfeksiya qilish, Ipak qurtini bahorgi va takroriy mavsumda parvarishlashdagi muhim agrotexnik tadbirlari hamda ipak qurti kasalliklari va ularning profilaktikasi borasida ko’nikmalar berildi.
So’nggida pillachilik sohasida faol ayollarga sertifikatlar topshirildi.
Yulduz SAMATOVA
