Jahon sog‘liqni saqlash tashkiloti ma’lumotlariga ko‘ra, dunyoda qandli diabet kasalligi tobora yosharmoqda. Hozirgi kunda Yer yuzi aholisining qariyb 7 foizi ushbu kasallikdan aziyat chekyapti. Ulardan juda katta qismi 2-turli qandli diabetga chalingan.
Kattaqo‘rg‘on tumanida jami 6383 nafar fuqaroda qandli diabet kasalligi aniqlangan. Ularning 2268 nafari tuman poliklinikasi ro‘yxatida turadi. Shulardan 117 nafarida 1-tip diabet, 2151 nafarida esa 2-tip diabet tashxisi qo‘yilgan. Qirq yoshdan oshgan aholi orasida o‘tkazilgan maqsadli skrining natijasida 433 nafar fuqaroda yangi holatlar aniqlangan.
Prezidentning “Endokrinologiya xizmatini takomillashtirish va ko‘lamini kengaytirish chora-tadbirlari to‘g‘risida”gi qaroriga asosan, qandli diabet kasalligiga chalingan bemorlar bepul dori-darmonlar bilan ta’minlanmoqda.
Surunkali endokrin kasalliklarni davolashning zamonaviy klinik protokollari va algoritmlari joriy etilmoqda. 2022–2024-yillarda aholiga endokrinologiya yordamini ko‘rsatishni rivojlantirish dasturi asosida olib borilayotgan ishlar hal qiluvchi ahamiyat kasb etmoqda.
Muhayyo Ashurova,
tuman tibbiyot birlashmasi endokrinologi.
