Qorako‘lcha mahalla fuqarolar yig‘ini aholisi zamonaviy texnologiyalardan foydalanishda o‘ziga xos yondashuvlarni amalga oshirmoqda. Yaqinda ushbu mahallada istiqomat qiluvchi fuqaro O‘tkir Qodirov o‘z uyiga 5 kVt quvvatga ega quyosh panelini o‘rnatdi.
O‘tkir Qodirovning aytishicha, ushbu quyosh paneli elektr energiyasi bilan bog‘liq qator muammolarga yechim bo‘lib, ayniqsa qishloq hududida energiya tanqisligini kamaytirishga katta yordam beradi. Panelning o‘rnatilishi nafaqat ekologik toza, balki iqtisodiy jihatdan ham ancha foydali.
“Dastlab, xarajatlar bir oz yuqori bo‘lgani rost, lekin uzoq muddatda bu energiya manbasi katta foyda keltiradi. Hisob-kitoblarga ko‘ra, panel yordamida yiliga elektr energiyasiga sarflanadigan xarajatlar deyarli yarmiga qisqaradi. Bu esa uyimning umumiy byudjetiga ijobiy ta’sir ko‘rsatadi,” – deydi O‘tkir Qodirov.
Mahalla aholisi ham bu tashabbusni qiziqish bilan qarshi olib, kelgusida ushbu texnologiyani kengroq qo‘llashni rejalashtirishmoqda. Quyosh energiyasidan foydalanish nafaqat atrof-muhitga ijobiy ta’sir ko‘rsatadi, balki energiya iste’molida mustaqillikka erishishga yordam beradi.
Texnologiya rivojlanishi va yangiliklarning tez sur’atlarda hayotimizga kirib kelishi bilan bunday tashabbuslar butun respublikamiz bo‘ylab tobora kengayib borishi shubhasizdir.
“Kattaqo‘rg‘on: kecha va bugun”.
