Keyingi yillarda mamlakatimizda olib borilayotgan bunyodkorlik ishlari zamirida inson qadrini ulug‘lash, odamlarning og‘irini yengil qilish, turmush sharoitlarini yaxshilashdek ezgu maqsad yotadi.
Bugungi kunda Melixo‘ja mahallasi obod maskanga aylanayotganligi, hududda tabiiy gaz, elektr energiyasi, ichimlik suvi ta’minoti yaxshilanib, yo‘llar ta’mirlanayotganligi mahalla ahlini quvontirmoqda.
Kattaqo‘rg‘on tumani hokimi Jamshid Nasriddinov, viloyat hokimligi Tashkiliy-kadrlar guruhi rahbari Begzod Raxmatullayev dastlab 66-maktabda mas’ul hamda biriktirilgan korxona rahbarlari bilan “Obod xonadon – obod ko‘cha – obod mahalla” dasturi doirasida qilingan ishlarni muhokama qildi. Shundan so‘ng, mahallada olib borilayotgan ishlar bilan tanishdi.
“Obodlik ko‘ngildan boshlanadi. Eng avvalo, mahalla ahli bu jarayonda faol ishtirok etishi, jamoatchilik nazoratini kuchaytirishi, dastur doirasida xonadonlar obodligiga ham e’tibor qaratilishi kerak”, - deya ta’kidladi tuman hokimi.
Bu borada ishlab chiqilgan loyihalar tahlil qilinib, bajarilayotgan ishlarni tez va sifatli yakunlash bo‘yicha mas’ullarga ko‘rsatmalar berildi.
