Kattaqo‘rg‘on tumani Kumushkent MFY hududida yirik sement zavodining ochilishiga bag‘ishlangan tadbir bo‘lib o‘tdi.
Ochilish marosimida Samarqand viloyat hokimi Erkinjon Turdimov, tuman hokimi Jamshid Nasriddinov, zavod rahbari, xitoylik investor Guo bin, tuman sektor rahbarlari, shuningdek turli davlat va jamoat tashkilotlari rahbarlari, taklif etilgan mehmonlar va ommaviy axborot vositalari vakillari ishtirok etdilar.
Zamonaviy texnologiyalar asosida sifatli sement mahsulotlarini ishlab chiqarish hamda O‘zbekistonda amalga oshirilayotgan qurilishlarga o‘z hissasini qo‘shish maqsadida: sement ishlab chiqarishni tashkil etish loyihasi asosida xitoylik investorlar ko‘magida barpo etilgan ushbu zavod yiliga 3 million tonna mahsulot ishlab chiqarish quvvatiga ega. 38,5 gektar yer maydonida joylashgan ushbu zavodni barpo etish uchun respublika Milliy bankining mablag‘lari hamda 340 million dollar miqdorida to‘g‘ridan-to‘g‘ri xorijiy investitsiya jalb qilingan bo‘lib, qurilish ishlari Xitoyning “China Energy Engineering Corporation” korxonasi tomonidan mahalliy quruvchilarni jalb qilgan holda amalga oshirildi. Ishlab chiqarish dastgohlari Xitoydan olib kelib o‘rnatildi.
Ushbu loyiha bo‘yicha sement zavodining yillik eksport quvvati 82,0 million AQSH dollarni tashkil etib, Yevropa va boshqa xorijiy davlatlarga yo‘naltiriladi. Zavod ishga tushishi natijasida 600 ta yangi ish o‘rinlari yaratiladi va bu ish o‘rinlariga asosan mahalliy aholi jalb qilinadi.O'tkir Usmonov.
