Bozor iqtisodiyoti sharoitida aholiga yengillik va qulayliklar yaratish maqsadida, ijtimoiy himoyaga muhtoj va daromadi kam bo‘lgan fuqarolar uchun hukumat tomonidan ko‘plab samarali ishlar amalga oshirilmoqa.
Xususan, Respublikamiz Prezidenti tomonidan joriy yil 23-sentabrdagi “Ipoteka kreditidan foydalanishda aholiga qo‘shimcha qulayliklar yaratish chora-tadbirlari to‘g‘risida”gi PQ-377 sonli va Vazirlar Mahkamasining 15-oktabrdagi “Aholiga ipoteka krediti va uy-joy sotib olish uchun subsidiya ajratish jarayonlarini soddalashtirish chora-tadbirlari to‘g‘risida”gi 601-sonli Qarorlari qabul qilindi. Ushbu Qarorlarning mazmunidan kelib chiqqan holda:
2022-yilning 1-noyabridan boshlab, xususiy pudrat tashkilotlari tomonidan tayyor holda topshirish shartisiz qurilgan uylardagi xonadonlarni birlamchi uy-joy bozorida ipoteka krediti ajratishda foizlarning bir qismini to‘lash uchun ruxsat etiladi va 2021-yildagi subsidiya ajratish to‘g‘risidagi xabarnomalarning amal qilish muddati 2023-yilgacha uzaytirildi.
2022-yilning 1-dekabridan subsidiyaga talabgorlarni tanlab olish komissiyalari tarkibidan hududiy Yoshlar ishlari agentligi bo‘lim boshlig‘i va aholi bandligiga ko‘maklashish markazi direktorlari chiqarib tashlanishi, shuningdek, subsidiya olish uchun arizani aholi bandligiga ko‘maklashish markazlari, Davlat kadastrlari palatasining hududiy boshqarmalari, Yoshlar ishlari agentligi bo‘limlari va tuman hokimligi tomonidan ko‘rib chiqish tartibi bekor qilinishi belgilandi.
Aholiga yanada qulaylik yaratish maqsadida, uy-joyga muhtoj fuqarolarni aniqlashning ijtimoiy mezonlari doirasida 30 yoshdan oshmagan fuqarolar va yosh oilalar, olis va chekka hududlardagi budjet tashkilotlariga boshqa hududlardan ishlash uchun kelgan oliy ma’lumotli mutaxassis va tibbiyot xodimlari ijtimoiy himoyaga muhtoj bo‘lgan ayrim shaxslar toifasiga kiritiladigan bo‘ldi.
Yana bir yangilik sifatida, bir kalendar yilida ikki marta ariza berishi mumkinligi va ipoteka krediti ajratilishida qarz oluvchilarga qarz yukining eng yuqori chegaralari bekor qilinishi tadbiq etildi.
Sanjar RABBIMOV,
Kattaqo‘rg‘on tuman Davlat xizmatlari markazi bosh mutaxassisi.
Kattaqo‘rg‘on tuman Davlat xizmatlari markazi bosh mutaxassisi.
