Ўзбекистон Республикаси Президентининг жорий йил 28 январдаги тегишли Фармонига мувофиқ Янги Ўзбекистоннинг тараққиёт стратегияси ва уни инсон қадрини улуғлаш ва фаол маҳалла йилида амалга оширишга оид Давлат дастурида балиқчиликни ривожлантириш ва балиқ етиштириш ҳажмини кўпайтириш бўйича бир қатор чора-тадбирлар белгилаб берилган. Каттақўрғон туманида айни пайтда 83 та балиқчилик фермер хўжалиги мавжуд ва улар ихтиёридаги сунъий кўллар 565 гектар, бундан ташқари, табиий сув ҳавзаларида балиқ етиштириш майдони 7499 гектарни ташкил қилади.
Туманда жорий йилнинг якунига қадар балиқчилик йўналишидаги хўжалик ва корхоналардан йил якунига 11399 тонна балиқ ишлаб чиқариш режалаштирилган. Бугунги кунда 1844 тонна балиқ ишлаб чиқарилган. Йил давомида балиқчилик йўналиши бўйича 22 та янги лойиҳалар ишга туширилди. Лойиҳага 9396 миллион сўм сарфлаш эвазига 40 гектар ер майдонида сув ҳавзалари яратилиб, балиқлантирилган. Натижада 130 нафар янги иш ўринлари яратилди.
"Ибодуллаев Иброҳим ҳалол балиқлари" балиқчилик кластерини ташкил этиш бўйича туман ҳокимининг қарори қабул қилинган фермер хўжалиги раҳбари Очилов Шоҳруҳ томонидан 22.5 гектар ер майдонида балиқ етиштирилмоқда. Хўжаликнинг сунъий сув ҳавзаси 67.5 минг дона балиқ чавоқлари ташланиб, йил якунига қадар 330 тонна балиқ етиштириш режалаштирилган. Ҳозирги вақтда 32 тонна балиқ етиштирилган. Фермер хўжалиги томонидан чет давлатдан озуқа тарқатиш мосламалари хамда аэраторлар олиб келинган.
Янги технология асосида боқишни йўлга қўйилиши ўтган йили гектаридан ўртача 4-5 тонна балиқ етиштирилган бўлса, бу йил интенсив усулда тўрт-беш баробар кўп, яъни 20 тонна балиқ етиштирилган.
"Келгуси йилда 50 тоннага чиқаришни мақсад қилганмиз. Балиқ кислородга тўйинмаслиги сабабли ўлиб қолади. Ушбу олиб келинган аэраторлар кислородни кўпайтириб беради. чавоқларни кўпроқ ташлаймиз. Балиқларнинг вазни 110 граммдан 250 гираммгача бўлади. Харидорлар қўшни вилоятлардан келиб балиқларни сотиб олиш учун олдиндан пулини бериб кетган. Сотиш муаммо эмас. Бошида балиқларни тўғри озиқлантиришни билмасдан ўлдириб қўйдим. Фермер хўжалигини бошлаганимда беш йил зарарига ишладим, олган кредитларимни ҳам тўлай олмадим. Қариндош-уруғлардан қарз олдим. Мақсадимдан қайтмадим. Барибир ўргандим. Бугун анчагина даромад оляпман. Аллоҳга шукр. Энди бошлаганларга ўргатишга тайёрман", - дейди фермер хўжалиги раҳбари Очилов Шоҳруҳ ака.
Келгусида туманда балиқчилик фермер хўжаликларида балиқ етиштириш учун 225 гектар интенсивлаштирилади, бу учун фермер хўжаликлари томонидан 4500 миллион сўм сарфлаш эвазига аэраторлар ва озиқлантириш мосламалари билан жиҳозланади.
Ўткир Усмонов.
