Мен яшаб турган ҳудудда пахта ва бошқа меҳнатталаб, шунингдек, сув ва қуёш нурини талаб қиладиган ўсимликлар экиш ва юқори ҳосил олиш машаққатли иш. Шу сабаб ҳудудимизда боғ, токзорлар ташкил этишга катта эътибор бериляпти. Яхши парвариш қилинса боғларимизда мўл ҳосил етиштириш мумкин.
Яхши ният билан 2009 йилда 4 гектар ердаги мавжуд боғни ўз ҳисобимизга олдик. Атиги 50-60 туп деярли ҳосил бермай қўйган дарахт қолган эски боғни қайтадан тайёрлаб, маҳаллий шароитга мослашган, серҳосил, касалликларга чидамли олма, нок, шафтоли ва бошқа мевали дарахт кўчатларини экдик. Туман ҳокимининг тавсиясига кўра 1,7 гектар майдонда кўчатчиликни ташкил қилдик. Бунинг учун турли жойлардан излаштириб топиб "Память ясаул" (Украина), "Футзи "(Япония), "Жереми", "Бойка" (Россия), "Қандилснаб" (Қирғизистон) каби олманинг ноёб турларини олиб келиб экдик ва "она боғ" яратдик.
Кейинчалик бу боғдан пайвандлаш йўли билан кўчат етиштириб сота бошладик. Ҳозирга келиб бу ерда йилига 32 мингта турли кўчат етиштирилди. Шунингдек, нок ва шафтолининг ҳам йўқолиб бораётган навларини Тошкент вилояти ва Қувадаги боғдорчилик илмий-тадқиқот институтларидан олиб келиб, кўпайтириш ҳисобига бу меваларнинг кўчатини етиштириш ҳам йўлга қўйилди.
Ҳозирги пайтда хўжалигимизда 6 нафар киши меҳнат қилади. Ёз-куз пайтида кўплаб маҳаллий аҳоли мавсумий ишга жалб этилади.
Кўчатларимизни нафақат туманимизда, балки Нуробод, Иштихон, Қўшработ ва бошқа туманларда ҳам харидорлари пайдо бўлди. Шундан хурсандмизки, биз меҳнатимизга яраша даромад олаяпмиз. Бу, албатта, юртимизда тадбиркорларнинг қўллаб-қувватланаётгани, қишлоқлардаги хотин-қизлар бандлигини таъминлашга эътибор кучайгани туфайлидир.
Махфират АБДУРАИМОВА,
"СУҲРОБ ЭШНАЗАРОВ"
фермер хўжалиги раҳбари.
"СУҲРОБ ЭШНАЗАРОВ"
фермер хўжалиги раҳбари.
