Президент ҳузурида ғаллачиликдаги ислоҳотларнинг энг муҳим босқичига бағишланган йиғилишда Давлатимиз раҳбари "Қанчалик қийин бўлмасин, 1 июндан бошлаб ғаллани давлат томонидан сотиб олиш ва сотишда бозор нархларига ўтамиз. Шунингдек, фермер ва кластерлар ўзлари етиштирган ғалласини биржа савдоларига олиб чиқишлари учун ҳам барча имкониятлар яратилади", деди.
Шунингдек, йиғилишда энг аввало, давлат ресурслари учун сотиб олинадиган 1 тонна буғдой нархи ўтган йилдаги 1 миллион 550 минг сўмдан жорий йил ҳосили учун 3 миллион сўмга, яъни 2 бараварга оширилиши маълум қилинди. Бу эса ғаллакорларимизни руҳлантириб, янада самарали меҳнат қилишга ундади.
Каттақўрғон тумани ғаллакорлари ҳам яратилган бундай имкониятдан руҳланиб, жорий йилда 8 минг 926 гектар майдонда мўл ғалла ҳосили етиштирдилар. Шартнома режасига асосан, давлатга 24 минг 986 тонна ғалла топширилиши белгиланган.
Шу кунларда туманда ғалла ўрими қизғин паллага кириб,ўрим-йиғим мавсуми уюшқоқлик билан олиб борилмоқда. Ўримга 25 та комбайн, юзлаб бошқа техника воситалари жалб этилган, ишлар отряд усулида олиб борилмоқда.
Ишларнинг самарали ташкил этилганлиги натижасида йиллик шартнома режасини бажараётган фермер хўжаликлари сони кундан кунга ортиб бормоқда.
Жумладан, "Пахтакор" ҳудудидаги "Омадли меҳнат даласи" фермер хўжалиги ғаллакорлари туманда биринчилардан бўлиб ғалла топшириш режасини ортиғи билан бажарди. Жорий йил ҳосили учун 60 гектар майдонда ғалла парваришлаган Ҳусан Шохўжаев раислик қилаётган фермер хўжалиги ғаллакорлари давлатга 222 тонна ғалла топшириб, шартнома режасини ортиғи билан бажарди. Ҳосилдорлик гектарига 65 центнердан тўғри келди. Шунингдек, тумандаги "Бибисора чамани", "Жавоҳир дашт далалари", "Йўлдош", "Худоёров Бердиёр Кубаевич", "Фаёзбек Тўхтаев даласи", "Жозилбек Нодирбек далалари", "Азим Рустамов даласи", "Омадли меҳнат даласи", "Тўйчиев Сайфулло даласи", "Олмосжон Раджаб-РУН" ва "Синов тажриба" каби фермер хўжаликлари зафар марраларини қучиб, ғалла топшириш шартнома режасини ортиғи билан бажардилар ҳамда туман хирмонига ўзларининг муносиб ҳиссаларини қўшишди.
Президентимиз ташаббуси билан жорий йилдан хўжаликлар томонидан сотиладиган ғаллага бозор нархида пул тўлаш тартиби жорий этилиши, энг аввало, фермер хўжалиги, қолаверса, хўжалик аъзоларининг манфаатдорлигини, оладиган даромадини ошириш имконини беради.
Туманда ғалла ўрим-йиғим мавсуми уюшқоқлик билан давом этмоқда.
Эшпўлат САФАРОВ.
