Кейинги йилларда Каттақўрғон туманида қишлоқ хўжалиги соҳаси тубдан модернизация қилинди. Ўтган йил кузида 2022 йил ҳосили учун 222 та фермер хўжаликлари томонидан 8926 гектар ер майдонига ғалла экилиб, умумий ҳисобда 32240 тоннадан ортиқ давлат хариди учун сара дон маҳсулотлари сотилиши режалаштирилган эди. Жорий йилда ғаллакор деҳқонларимизнинг самарали меҳнатлари эвазига ғалладан мўл ҳосил олиниши кутилмоқда. Ҳадемай кузда экилган дон уруғлари пишиб етилади ва ўрим-йиғим мавсуми бошланади.
Ғалла ўрим-йиғимининг юқори суръатларда ўтиши соҳа мутахассисларининг бугунги саъй-ҳаракатига ҳам боғлиқ. Буни тўлиқ англаган ғаллачилик фермер хўжаликлари ва кластер корхоналари мутасаддилари мўл ҳосил етиштириш мақсадида астойдил меҳнат қилмоқда. Бошоқли дон ўрим-йиғими ишларида қатнашадиган комбайнларни мавсумга ҳозирлаш ишлари туманимизда тизимли асосда, изчиллик билан олиб борилди.
"Ўзагроинспекция"нинг туман бўлими томонидан ушбу комбайнларни мавсумга тайёргарлиги билан боғлиқ барча ишлар мониторинг қилиб борилди ва бунинг натижасида ҳозирда 25 та комбайнларнинг таъмирлаш ишлари тўлиқ якунланди ва шай ҳолатга келтирилди.
Тўлиқ таъмирдан чиқарилган комбайнларда барча узел ва агрегатлар ишга солинган ҳолда 10-15 километр масофада синаб кўрилмоқда. Тадбир якунида техник талабларга жавоб берадиган комбайнлар туманда ташкил этилган махсус ишчи гуруҳи томонидан ўрим-йиғим мавсумига тайёрлигини кафолатлайдиган сертификат берилиб, шу асосида ўрим-йиғим маррасига олиб келиб қўйилмоқда.
Бундан ташқари, комбайнларнинг мавсум давомида узлуксиз ишлашини таъминлаш мақсадида уларга "УзКЕЙССЕРВИС" ва "УзКЛААССЕРВИС" қўшма корхоналарининг малакали мутахассислари бириктирилди. Ҳар бир комбайнга ўриб олинган донни ташиш учун мавсум давомида 4 тадан юк автомашиналари беркитилган бўлиб, уларнинг доимий ишлаши туман ИИБ ва ЙҲХБ ходимлари томонидан назорат қилиб борилади. Шунингдек, тумандаги 2 та товар-дон қабул қилиш ва 1 та уруғлик ғалла қабул қилиш масканлари тайёр ҳолатга келтирилди.
Комбайн ҳайдовчиларини рағбатлантириш мақсадида уларга олдиндан бўнак пуллари ажратилиб, кундалик зарурий озиқ-овқат маҳсулотлари билан таъминланмоқда. Бундан ташқари, уларга мавсум давомида ўрилган ғалла майдони ва маҳсулот миқдори учун қўшимча мукофот пуллари берилади. Шунингдек, уларни иссиқ овқат билан таъминлаш ва дам олишлари учун шарт-шароитлар яратишга ҳам алоҳида эътибор қаратилади.
Бир сўз билан айтганда, туманимиз деҳқонларининг машаққатли меҳнати ва пешона тери эвазига яратилган улкан ғалла хирмони тез кунларда ва сифатли ўриб-йиғиб олинади.
Олимжон ЭГАМБЕРДИЕВ,
"Ўзагроинспекция"нинг Каттақўрғон туман бўлими катта инспектори.
