Яқинда ижтимоий тармоқларда “Каттақўрғон тумани Сув ҳовузи қўрғончаси Кумуш қирғоқ маҳалласидан ёзмоқдамиз. Канал атрофи чиқиндига тўлиб кетган” мазмундаги пост эълон қилинди.Туман ҳокимлиги ва тегишли ташкилотлар мутасаддилари томонидан ушбу пост жойига бориб ўрганиб чиқилди. Ҳақиқатан ҳам Кумуш қирғоқ ва Саройқўрғон маҳаллалари ҳудудидан ўтувчи Чиқиш канали қирғоғи атрофига чиқиндилар ташланган. Бу чиқиндиларни бошқалар эмас, балки шу ҳудудда яшовчи ҳамда шу ҳудудга чегарадош қишлоқ аҳолиси ташлашганлиги маълум бўлди.
Туман “Тоза ҳудуд” корхонаси, туман Ободонлаштириш бошқармаси ҳамда ҳомийларнинг техника ва ишчилари ёрдамида ушбу канал атрофидан 70-75 “Камаз” чиқинди чиқарилиб, канал атрофи тўлиқ тозаланди. Ўзлари канал атрофини чиқиндихонага айлантириб, яна ижтимоий тармоққа чиқиши ўзи пиширган ошни ўзи егиси келмай қолгандек гап. Ҳурматли фуқаролар, уйингиз, ҳовлингиз, қишлоғингиз ҳудудини тоза-озода сақлашга масъулият билан қарашингизни, канал атрофига чиқинди ташламасликларингизни сўраб қоламиз. Тозалик-ўзингизга боғлиқ. Каттақўрғон туман ҳокимлиги Ахборот хизмати
