Электрни ўғирлаган электрик ўттиз кун ичида бир қарорга келди

0 105

Мажбурий ижро бюроси Қўқон шаҳар бўлими томонидан “Деҳқон бозори” ҳудудида электр энергиясидан фойдаланиш қоидаларига риоя этилиши юзасидан текшириш ўтказилди. Бозор маъмуриятида электрик бўлиб ишлаб келаётган И.Азимов электрдан ноқонуний фойдаланиш йўлини тутганлиги аниқланган. 

Хусусан, И.Азимов бозор ҳудудига ўрнатилган электр ҳисоблагичнинг “Б” фаза ток трансформаторининг “А” кучланиш симини узиб қўйиб, электр тармоғига тўғридан-тўғри улаб қўйган ва бунинг оқибатида давлат манфаатларига 23 млн. 436 минг сўмлик моддий сўм зарар етказган. 

Унинг ҳаракатларида Ўзбекистон Республикаси ЖКнинг 1852-моддасида кўрсатилган жиноят аломатлари аниқланганлиги сабабли унга нисбатан терговга қадар текширув ҳаракатлари ўтказилиб, қонун талабига кўра жиноят аниқланган кундан бошлаб ўттиз кун ичида зарарни тўлиқ қоплаган тақдирда жиноий жавобгарликка тортилмаслиги тушунтирилган. 
Шунга кўра, қонун бузар И.Азимов ишни жиноий жавобгарликкача олиб борилишидан кўра зарарни тўлиқ қоплашни маъқул кўриб, шаҳар электр таъминоти корхонасига 23 млн. 436 минг сўм тўлаб қўйди. 

ЎзА.




Ўхшаш янгиликлар


ЖАМОАТЧИЛИК НАЗОРАТИ