Мутаассиблик муайян ғояларнинг мутлақ тўғри эканига қаттиқ ишониш, уларга муккасидан берилиш, ўзгаларнинг фикри ва ўзгача қараш ҳамда ғояларга муросасиз муносабатда бўлишдир. Диний жиҳатдан эса бу бошқа фирқа, мазҳабларни бутунлай рад этиш, уларни тан олмасликда намоён бўлади. Мутаассиблик барча даврларда турли дин ва йўналишлар орасида кескин низо, тўқнашувларни келтириб чиқаришга замин яратган. Қалби, онги заҳарланган ва мутаассибга айланган шахслар қилаётган ҳар қандай номақбул ишини тўғри деб ҳисоблайди. Мутаассибликнинг жирканч башараси дунёнинг турли нуқталарида содир этилаётган қўпорувчилик ва хунрезликларда яққол намоён бўлмоқда.
Дунёвий ва диний билимлар борасида соғлом дунёқарашни, соф диний тушунчаларнинг асл мазмунини англамаслик ҳам мутаассиблик ғояларининг тарқалишига замин яратиши мумкин. Замонавий манбаларда бу ҳодиса "фанатизм" номи билан келтирилади. Мутаассиб хатти-ҳаракатлари ва қарашларида ҳаддан ошувчи, қарашларининг тўғри ёки нотўғрилигидан қатъи назар, кўр-кўрона ёқловчи, фикрида қатъий турувчи, бошқалар фикрини ноҳақ деб билувчи шахс сифатида ўз фикрини амалда кўрсатишга ҳаракат қилади.
Ўзбекистон Республикаси Президентининг 2019 йил 4 сентябрдаги "Диний-маърифий соҳа фаолиятини такомиллаштириш бўйича қўшимча чора-тадбирлар тўғрисида"ги ва вилоят ҳокимининг 2019 йил 13 сентябрдаги "Вилоятда ижтимоий-маънавий муҳитни янада соғломлаштиришга қаратилган қўшимча чора-тадбирлар тўғрисида"ги қарорлари ижросини таъминлаш ҳамда ижтимоий-сиёсий жараёнларга диний тус берилишини, сохта ғояларни асл диний қадриятлар сифатида талқин қилинишини ва аҳолига носоғлом ақида сингдирилишининг олдини олиш, миллий ва диний қадриятларга ҳурматни янада ошириш, ёшлар таълим-тарбиясига жиддий эътибор қаратиш, жамиятда "Жаҳолатга қарши - маърифат" улуғвор ғоя асосида диннинг инсонпарварлик, эзгулик ва тинчлик каби фазилатларини ҳамда диний бағрикенглик руҳини кенг тарғиб қилиш, ижтимоий-маънавий муҳит барқарорлиги ва қонун устуворлигини таъминлаш мақсадида Каттақўрғон туман ҳокимининг тегишли қарори қабул қилиниб, ушбу қарорга асосан ишчи гурух ташкил қилинди. Ҳозирда 69 та маҳалладаги жами 117 нафар ижтимоий кўмакка муҳтож шахслар ва уларнинг оиласини ижтимоий-маънавий ва социал-иқтисодий ҳолати ҳамда эҳтиёжлари ўрганиб чиқилмоқда ҳамда уларга амалий, маънавий ва маърифий ёрдам кўрсатилмоқда.
Ташкил этилган ишчи гуруҳ томонидан маҳаллаларда ижтимоий ҳимояга муҳтож бўлган фуқаролар билан, мактабгача таълим муасассалари, мактаб, маҳалла ва бошқа жамоат ташкилотларида давра суҳбатлари амалга оширилиб, ҳозирги кунда давлатимиз томонидан амалга оширилаётган ислоҳотлар мазмуни тушунтирилмоқда.
Маърифат башарият фаровонлигининг асосий омилидир. Шу боис, инсон маънавий олами, халқимиз маданиятини белгилайдиган манбаларни асраб-авайлаш ва бойитиш ҳамда жаҳон илм-фани ютуқлари, умумбашарий тараққиёт тажрибалари асосида ёвуз, бузғунчи ғояларга қарши маърифат билан курашиш долзарб аҳамият касб этади.
Ғ.ФОЗИЛОВ,
Каттақўрғон туман ИИБ ходими.
Каттақўрғон туман ИИБ ходими.