Туманда 2019 йилдан бошлаб қишлоқ хўжалик соҳасини тубдан ислоҳ қилиш, соҳани техник ва технологик жиҳатдан модернизация қилиш, илм фан ва инновацияни жорий қилиш бўйича кенг кўламли ишлар олиб борилди. Ўтган йил чигит экиш ва ишлов бериш учун 19 та замонавий пневма сеялка, 32 та культиватор, 10 та ҳайдов, 20 та замонавий чопиқ тракторлари олиб келинди ва мавжуд қишлоқ хўжалик техникаларини 15-20 фоизга янгилашга эришилди. Куни кеча туманга Туркия давлатидан 72 дона замонавий пневма сеялкалар олиб келинди. Ҳозирда замонавий сеялкалар сони 100 тадан ошиб кетди. Бундан ташқари жорий йилда юқори кучланишли 35 та тракторлар олиб келинди. Қишлоқ хўжалиги ходимлари ва фермерларга барча шарт-шароитлар яратилди. Энди фермерларимиз техника муаммосига дуч келмайди. Бежизга айтишмайди “Иш қуролинг соз бўлса, машаққатинг оз бўлар” деб.
Деҳқонларимиз жорий 2020 йилда 10 минг 974 гектар майдонда пахта хомашёси етиштиришни режа қилган. Туман пахтакорлари экиладиган уруғлик чигитни тўлиқ туксизлантириб, Германияда ишлаб чиқарилган дорилар билан ишлов бериб, гектарига 100 килограмм калий, 200 килограмм 46 фоизли фосфор билан экишни бошлади.
Президентимиз видеоселекторда пахта ҳосилдорлигини гектарига 10 фоизга, ғалла ҳосилдорлигини гектарига 20 фоизга ошириш, янги боғ ва токзорлар орасига сабзавот экинлари экиб, ердан унумли фойдаланиш лозимлигини таъкидлаб ўтдилар. Туманимиз деҳқонлари жорий йилда билим ва тажрибасини ишга солиб, техника воситаларидан унумли фойдаланиб, қишлоқ хўжалигининг барча соҳаларида юқори натижаларга эришадилар. Чунки, қишлоқ хўжалик ходимларига яратилган кенг кўламли имкониятлар эртага албатта ўз самарасини беради. 2020 йил туманимизда қишлоқ хўжалиги учун туб бурилиш йили бўлади.
Ўз мухбиримиз.
