Юртимизда амалга оширилаётган барча ислоҳотлар замирида халқимизнинг турмуш фаровонлигини яхшилаш, одамларимизнинг бахтли яшашини таъминлашдек эзгу мақсадлар мужассам.Бу борада халқ билан мулоқот қилиш, уларнинг муаммоларини ўрганиш, ижобий ҳал этиш устувор масала сифатида илгари сурилгани халқимизнинг давлатдан, жамиятдан рози бўлиб яшашида муҳим омил бўлмоқда. Ўтказиб келинаётган сайёр қабуллар эса гапимизнинг яна бир исботидир.
Куни кеча туман ҳокими Аъзамхон Бахрамовнинг туман ҳокимлиги биносида навбатдаги сайёр қабули ўтказилди. Ўзбекистон Республикаси Президентининг Каттақўрғон туманидаги Халқ қабулхонаси мудири З.Абдуллаев, секторлар ва ҳуқуқни муҳофаза қилувчи органлар раҳбарлари ҳамда туман ҳокимлиги мутасаддилари иштирок этган сайёр қабулда аҳолининг мурожаатлари атрофлича ўрганиб чиқилди. Очиқ мулоқот шаклида ташкил этилган қабулга келган фуқароларнинг мурожаатлари раҳбарларнинг эътибор марказида бўлиб, бирма-бир тингланди.
Қабул жараёнида 70 нафарга яқин фуқаролар турли хил мурожаатлар билан қатнашиб, аксарият фуқароларнинг мурожаати жойида қаноатлантирилди, қолган муддат талаб этиладиган мурожаатларга тегишли тушунтириш ва тавсиялар берилди. Қабул давомида фуқаролар асосан электр энергияси таъминотидаги узилишларни бартараф этиш, ички йўлларни таъмирлаш, тадбиркорлик фаолиятини кенгайтириш учун имтиёзли кредитлар ажратилиши, мактаб ва мактабгача таълим муассасаси очиш бўйича ўз таклифларини билдирдилар.
